Адзін з 16 праектаў помніка княгіні Вользе, заснавальніцы Віцебску, павінны абраць жыхары горада і журы, канчатковы склад якога яшчэ не зацверджаны. Грамадскае абмеркаванне і галасаванне ідзе ў Музычнай гасцёўні. Скульптары выставілі свае праекты ананімна, не агучваюцца нават прозвішчы, каб віцебчукі не аддалі перавагу знаёмым.
Цікава, што бальшыня скульптараў выкарыстала амаль аднолькавае кампазіцыйнае вырашэнне помніку – Вольга з крыжом у адной руцэ ды будынкам, падобным на Дабравешчанскую царкву, у другой. Нібыта перад тым, як заняцца ўвасабленнем заснавальніцы Віцебску, яны атрымалі нейкую “дзяржзамову”. Мастакі прадставілі не толькі праекты помнікаў, але і пажаданую прывязку іх да мясцовасці. Самым арыгінальным падаецца размяшчэнне помніку на... даху вежы аблывыканкамаўскага будынку. Калі гэты праект атрымае “дабро”, вежу давядзецца перабудаваць ды прыбраць з яе гадзіннік.
А вось калі пераможа другі варыянт, помнік заснавальніцы Віцебску можа стаць адначасова і помнікам расейскай дзяржаўнасці. Скульптар размясціў побач з Вольгай арла, і у суправаджальным артыкуле патлумачыў гэта тым, што “моцная гордая птушка”, на якую паказвае рукой княгіня, ўяўляе сабой “сымбаль дзяржавы расійскай”.
Вы можаце пакінуць свой каментар, уласную думку ці пытанне па выкладзенаму вышэй матэрыялу.