Канчатковы спіс грамадзянаў СССР, загінулых у гады Вялікай Айчыннай вайны, будзе складзены да 2010 года. Пра гэта заявіў начальнік Генеральнага штаба Ўзброеных сіл Расіі, генерал Мікалай Макараў.
Удакладненнем спісу загінулых у 1941-1945 гадах зоймецца адмысловая міжведамасная камісія. У яе склад увойдуць адмыслоўцы Мінабароны, МУС, ФСБ, МНС, Расійскага дзяржархіву, Цэнтральнага архіву Мінабароны, а таксама незалежныя эксперты.
У спіс загінулых у вайне будуць уключаныя не толькі вайскоўцы, але і грамадзянскія асобы. Таксама будуць ацэненыя матэрыяльныя страты ў выніку ваенных дзеянняў.
У 1941-1945 гадах, паводле апошніх звестак, загінулі 26,6 млн жыхароў Савецкага Саюза. Пры гэтым 2,4 млн чалавек лічацца зніклымі без вестак, а імёны 6 млн чалавек, пахаваных у братэрскіх магілах, застаюцца невядомымі.
Па звестках Дзяржаўнай архіўнай службы Беларусі, у 1941-1945 гадах загінулі 2,2 млн. жыхароў Беларусі. Аднак тут не ўлічаныя людзі, што былі вывезеныя ў Нямеччыну і загінулі там. Іх колькасць па розных ацэнках складае каля 260 тыс. чалавек. У агульны лік загінулых не ўключаныя таксама беларускія жыхары, якія зніклі без вестак або трапілі ў палон і загінулі там.
Нагадаем, што паводле афіцыйных заяваў апошняга часу за гады Вялікай Айчыннай вайны загінулі ад 2,5 да 3 млн і больш жыхароў Беларусі, г.зн. не меней, чым кожны трэці жыхар.
Вы можаце пакінуць свой каментар, уласную думку ці пытанне па выкладзенаму вышэй матэрыялу.