Адбыўся Полацкі царкоўны сабор

12 лютага 1839 г. адбыўся Полацкі царкоўны сабор, на якім "аднадушна" падабраныя загадзя ўладай ўдзельнікі прынялі "саборны акт" аб далучэньні уніяцкай царквы да Рускай праваслаўнай і накіравалі прашэньне аб гэтым Мікалаю I. Цар 25 сакавіка 1839 г. зацьвердзіў саборны акт і далучыў уніяцкую царкву ў Расеі да Рускай праваслаўнай царквы. У праваслаўе перайшло больш за 1170 тысяч чалавек, больш за 543 тысячы адмовіліся і прынялі рымска-каталіцкае веравызнаньне. На тэрыторыі каралеўства Польскага (Сядлецкая, Люблінская і Сувалкаўская губэрні) царкоўная унія была ліквідаваная ў 1875 г. Частка уніятаў (асабліва ў Віцебскай губэрні) не прызнала акту ліквідацыі уніяцкай царквы. Жыхары соцень вёсак адмаўляліся прызнаваць праваслаўных сьвятароў. Паліцыя карала жыхароў з усёй жорсткасьцю.